Këngëtarja Vesa Luma ka vendosur të fillojë studimet për master në Prishtinë. Ajo për momentin nuk mendon të realizojë ndonjë këngë të re, por planifikon t’u përkushtohet studimeve. “Këto ditë kam filluar studimet master në Universitetin AAB në drejtimin Komunikim Masiv. Për momentin nuk kam në plan realizimin e ndonjë kënge të re, pasi do përkushtohem më shumë te studimet deri në prill të këtij viti, kur edhe mbaron një pjesë e ligjëratave”, tregon këngëtarja për “Panorama plus”.

Me një këngë dhe klip të ri këto ditë është paraqitur edhe këngëtarja Leonora Jakupi. Teksti i këngës është shkruar nga Arsim Bunjaku kurse muzika është bërë nga Darko Dimitrov. Leonora i ngelet besnike rrymës muzikore pop, të cilën e kultivon shumë mirë. Kësaj kënge ajo i ka punuar edhe klipin për të cilin është përkujdesur regjisori maqedonas Alexander. Këngëtarja tregon se është ndarë tejet e kënaqur me sukseset që ka pasur në vitin 2009, meqë këtë vit ajo kishte sjellë dy këngë dhe klipe që patën shumë sukses, të shndërruara në hite. Ndërkaq, vitin 2010 do ta fillojë me suksese tjera të radhës.